ബെംഗളൂരു: ബെംഗളൂരു മെട്രോയുടെ യെല്ലോ ലൈനിൽ ട്രെയിൻ സമയവിവരങ്ങൾ കാണിക്കുന്ന ഡിസ്‌പ്ലേ ബോർഡുകളും അനൗൺസ്‌മെന്റുകളും തെറ്റായതോടെ വെള്ളിയാഴ്ച വൈകുന്നേരം യാത്രക്കാർ രണ്ടു മണിക്കൂറിലേറെ ദുരിതത്തിലായി. വൈകുന്നേരം 5.25 മുതൽ 7.35 വരെയാണ് യാത്രക്കാർക്ക് വിവരങ്ങൾ കൃത്യമായി ലഭിക്കാതെ പ്രയാസം നേരിട്ടത്.
ജി.പി.എസ് (GPS) സെർവറിലുണ്ടായ സാങ്കേതിക തകരാറാണ് ട്രെയിൻ സമയ വിവരങ്ങൾ തത്സമയം നൽകുന്ന പാസഞ്ചർ ഇൻഫർമേഷൻ ഡിസ്‌പ്ലേ സിസ്റ്റത്തെയും (PIDS), പബ്ലിക് അഡ്രസ് സിസ്റ്റത്തെയും (PAS) ബാധിച്ചതെന്ന് ബെംഗളൂരു മെട്രോ റെയിൽ കോർപ്പറേഷൻ ലിമിറ്റഡ് (BMRCL) അറിയിച്ചു.
എന്നാൽ ഈ തകരാർ മെട്രോ സർവീസുകളുടെ പ്രവർത്തനത്തെ ബാധിച്ചില്ലെന്നും ഇരുവശങ്ങളിലേക്കും തിരക്കുള്ള സമയത്തെ നിശ്ചിത സമയപരിധിയായ ആറ് മിനിറ്റ് ഇടവേളയിൽ തന്നെ ട്രെയിനുകൾ സാധാരണ നിലയിൽ സർവീസ് നടത്തിയതായും ബി.എം.ആർ.സി.എൽ കൂട്ടിച്ചേർത്തു.
